ගොවි බිරියගේ නුවණ – සිංහල භාෂාව හැඳින්වීම
ජන කතා යනු මිනිසුන් ලිවීමේ ක්‍රමයක් නො දැන සිටි අවධියේ සිට කටින් කට පැවත එන, ජනයා අතර ම නිර්මාණය වූ කතා විශේෂයකි. ලෝකයේ සෑම රටක ම පාහේ ඒ රටට ආවේණික වූ ජන කතා සම්ප්‍රදායක් දැකිය හැකි ය. ජන ව්‍යවහාරයේ පවතින විවිධ යෙදුම්, විශ්වාස ආදිය ජන කතාවක ඇතුළත් වේ. පසු කාලයක දී මෙබඳු ජන කතා ලේඛනගත කෙරිණි. අද වන විට අප රටට ආවේණික ජන කතා පමණක් නො ව වෙනත් රටවල ජන කතා ද සිංහල භාෂාවෙන් පළ වී ඇත. මෙම පාඩමට ඇතුළත් වන්නේ ශ්‍රී ලංකා ජාතික ග්‍රන්ථ සංවර්ධන මණ්ඩලයේ මෙහෙයවීමෙන් අධ්‍යාපන ප්‍රකාශන දෙපාර්තුමේන්තුව විසින් පළ කරන ලද, ළමයින් සඳහා ආසියානු ජන කතා දෙවන පොතෙන් උපුටා ගත් කතාවකි. ආසියානු ජන කතා දෙවන පොත, ජපානයේ යුනෙස්කෝ ආසියානු සංස්කෘතික මධ්‍යස්ථානය විසින් පළ කරන ලද Folk tales from Asia for Children Everywhere – Book Two නම් ග්‍රන්ථයෙහි සිංහල පරිවර්තනය යි. ‘ගොවි බිරියගේ නුවණ’ පකිස්ථාන ජන කතාවකි.